無綫近期播緊電視劇《鐵探》入面，惠英紅飾演嘅總警司不斷爭權，希望有朝一日成為「一姐」。話說喺香港警隊175年歷史上，至今都未曾有女性做過警務處長，阿史就諗起前排退休、轉任申訴專員嘅警務處副處長趙慧賢，佢已經係警隊歷史上最高職級女警。

根據報道，九十年代嘅女警只有唔夠10%，督察或以上職位嘅女性就多少少，得11%。去到2017年，警隊有超過16%女警，督察或以上職位嘅就有差唔多成29%。依家警隊最職級嘅女警係高級助理處長、監管處處長劉賜蕙，佢曾經借調去社署，幫手處理呃綜援嘅個案。喺2008年做大嶼山指揮官嘅時候，劉賜蕙處理過機場的士堵路罷駛事件，當時嘅果斷指揮備受肯定。而助理處長方面，就有早排接任警察學院院長嘅張靜、助理處長〔支援〕林曉彤等明日之星。

記得警隊前排舉行招募日，有傳媒就訪問咗一位女申請者，佢話目標係想做女警務處長，年紀輕輕就咁有大志，唔知佢有無機會創造歷史？

圖片取自網絡。